३ श्रावण २०८१, बिहीबार

झडपमा बालक मृत्यु प्रकरण : १२ जनाविरुद्ध जाहेरी दरखास्त, ४ मात्र पक्राउ



डडेल्धुरा । डडेल्धुराको आलिताल गाउँपालिका ६ मा एक बालकको ज्यान जाने गरी भएको घटनामा संलग्न १२ जनाविरुद्ध कर्तव्य ज्यानमा जाहेरी दरखास्त परेको छ।

शुक्रबार राति दुई गाउँका नागरिकबीच खानेपानीको पुरानो विवादलाई लिएर भएको झडपमा ८ वर्षीय बालक हिमान्सु महरा गम्भीर घाइते भए। टाउकोमा चोट लागेर बेहोस भएका बालकको धनगढीमा उपचारका क्रममा शनिबार बिहान ५ बजे मुत्यु भयो । त्यसलगत्तै ४ जनालाई पक्राउ गरि जिल्ला प्रहरी कार्यालय डडेल्धुराको थुनामा राखेर अनुसन्धान थालिएकाे प्रहरी जनाएको छ। शनिबार दिउँसो नै मृतकका बुवा गणेशबहादुर महराले कैलाली प्रहरीमार्फत् जिल्ला प्रहरी कार्यालय डडेल्धुरामा १२ जनाका नाममा किटानी जाहेरी दर्ता गरेको डडेल्धुरा प्रहरीले जनाएको छ ।

पीडित पक्षले घटनामा एकै गाउँका १२ जना दोषी रहेकाे जनाएको छ। घटना शुक्रबार राति पीडित पक्षको घरमा भएको बुझिएको प्रहरीले जनाएको छ। पीडित पक्षले आफनो घरमा ऋण तिर्न राखेको १ लाख नगद तथा सुनका गहनासमेत पीडकले चोरी गरेको आरोप लगाएका छन्।

घटनामा मृतक बालककी आमा मीना बोहरा महरा पनि घाईते रहेको जाहेरीमा उल्लेख भएकाे स्रोतले जनाएको छ । खानेपानी विवादले उग्ररुप लिएपछि भएको झडपमा बालकको मृत्यु भएपछि गाउँले त्रसित छन्। एक स्थानीयले भने, ‘यस्तो घटना हाम्रो गाउँमा पहिलो पटक भएको हो, सामान्य खानेपानीको विवादले कलिलो बच्चाले ज्यान गुमाउनु पर्दा गाउँले दुखित छन्।’

अपराधीहरुलाई मुलुकी अपराध संहिता २०७४ बमोजिम हदैसम्मको कारबाहीकाे माग गरिएको छ। मुलुकी अपराध संहिता, २०७४ को १७७ मा ज्यान मार्ने नियतले कुनै काम गर्न नहुने, यदि भएमा २ उपदफा (१) बमोजिमको कसूर गर्ने वा गराउने व्यक्तिलाई जन्मकैदकाे सजाय हुने उल्लेख छ ।

प्रतिक्रिया दिनुहोस्
विशेष समाचार