बझाङको पहिरोमा हराएका पाँच जनाको शव भेटियो (हेर्नुस शव भेटिएकाको नाम समेत )
बझाङ । बझाङको केदारस्यू गाउँपालिका–८ मेल्लेसमा गएको पहिरामा हराएका सात जनामध्ये पाँच जनाको शव भेटिएको छ ।
स्थानीय नरेश जेठाराका अनुसार एउटै घरका तीन जना सहित पाँच जनाको शव पहिरोबाट निकालिएको छ ।
पहिरोमा ४४ वर्षीया रमादेवी जेठारा, उनका ११ वर्षीय छोरा प्रयाग जेठारा र ७ वर्षीया छोरी अस्मिता जेठाराको शव भेटिएको हो ।
यस्तै गरेर ८० वर्षीय दले जेठारा र नवराज जेठाराकी ११ वर्षीया छोरी सन्तुकुमारी जेठाराको शव पनि भेटिएको छ ।
वेपत्ता भएका सोही गाउँका प्रेम जेठाराका २० वर्षीय छोरा गिरिजा जेठारा र १५ वर्षीया शान्ति जेठाराको अवस्था अझै अज्ञात छ ।
शुक्रबार राति एक बजेतिर एकाएक गाउँको विचमा बग्ने खोलामा पहिरो आएको बताइएको छ ।
प्रहरी टोलीसंग सम्पर्क हुन नसकेकोले विस्तृत जानकारी प्राप्त हुन सकेको छैन ।
उद्धारका लागि गएको सेनाको गाडी पनि पहिरोमा फसेको छ । पहिरोमा गाडी फस्दा सेनाका तीन जना सैनिक जवान घाइते भएको बताइन्छ ।
