गड्डाचौकीमा ७७ फिटको राष्ट्रिय झण्डा
महेन्द्रनगर । । नेपाल प्रवेशको पश्चिमी सीमा नाका गड्डाचौकीमा राष्ट्रिय झण्डा फहराएको छ । १३ औं गणतन्त्र दिवसको अवसर पारी बिहीबार नेपालका सबै ७७ जिल्लाको प्रतिनिधित्व हुने गरी पश्चिमी नाकामा झण्डोत्तोलन गरिएको छ ।
नेपाल र नेपालीको पहिचानका लागि भीमदत्त नगरपालिकाले पश्चिमी सीमा नाकामा ७७ फिटको स्तम्भमा नेपाली झण्डा फहराएको छ । भीमदत्तका नगर नगर प्रमुख सुरेन्द्र विष्ट, नगर उप प्रमुख सुशिला चन्द सिह, र प्रमुख जिल्ला अधिकारी नूरहरि प्रसाद खतिवडा झण्डोत्तोलन गरे ।
सो अवसरमा बोल्दै प्रमुख जिल्ला अधिकारी खतिवडाले पश्चिमी नाकामा राखिएको झण्डाले राष्ट्रको प्रतिनिधित्व गरेको बताए ।
‘आज गणतन्त्र दिवसको दिन फहराएको यो राष्ट्रिय झण्डाले सिंगो राष्ट्रको प्रतिनिधित्तव गर्छ’ प्रमुख जिल्ला अधिकारी खतिवडाले भने, ‘यो झण्डा हाम्रो मान, सम्मान र प्रतिष्ठा र गौरव हो ।’
विदेशिएकाले देशको माया राम्ररी अनुभूति गर्न सक्ने उल्लेख गर्दै प्रमुख जिल्ला अधिकारी खतिवडाले विदेशबाट घर फर्किएकाहरुले झण्डाको फेदमा बसेर थकाई मेट्न सक्ने बताए ।
प्रमुख जिल्ला अधिकारी खतिवडाले भीमदत्त नगरपालिकाले पश्चिमी नाकामा राष्ट्रिय झण्डा फहराएर राष्ट्रिय पहिचानको संवद्र्धनमा महत्वपूर्ण भूमिका निर्वाह गरेकोमा आभार व्यक्त गरे ।
कार्यक्रममा भीमदत्त नगरपालिकाका नगर प्रमुख सुरेन्द्र विष्टले पश्चिमी नाकामा फहराएको झण्डाबाट नेपाल र नेपालीको पहिचानलाई विश्वभर थप बलियो बनाउन सहयोग पुग्ने बताए ।
‘माटो जन्मभूमि बिस्र्यौ भने मुलुक बन्न सक्दैन, त्यसका लागि सबै हामीमा इच्छा र प्रतिवद्धता चाहिन्छ’ नगर प्रमुख विष्टले भने ,‘त्यसैले यो झण्डाले विश्वभर एकताको सन्देश दिन्छ, राष्ट्रयताको सन्देश दिन्छ, राष्ट्रियता र पहिचानलाई सृदृढ बनाउन थप सहयोग पुग्छ ।’
कोरोना महामारीका कारण झण्डोत्तोलन कार्यक्रमलाई समान्य रुपमा गरिएको उल्लेख गर्दै नगर प्रमुख विष्टले यो कार्यक्तमबाट देशभर भावानात्मक एकताको सन्देश प्रवाह भएको बताए ।
नगर प्रमुख विष्टले नाकामा झण्डा फहराउन वडा कार्यालय सहित विभिन्न क्षेत्रका सरोकारवालाको सहयोग रहेको बताए ।
भीमदत्त नगरपालिकामा गत गत वर्षदेखि झण्डा फहराउने कार्य सुरु गरिएको थियो । नगरपालिकाले झण्डासंगै पार्क निर्माण गर्ने योजना समेत बनाएको छ ।
गणतन्त्र दिवसको शुभकामना दिदैं नगर प्रमुख विष्टले कोरोना महामारी तेस्रो विश्वयुद्ध भन्दा पनि खतरनाक देखिएकाले सबैले एकजुट भएर सामना गर्नु पर्नेमा जोड दिए ।
‘अहिले कोरोना जित्नु एक साथ जान आवश्यक छ, तेस्रो विश्वयुद्ध भन्दा पनि बढी यसको जोखिम छ’ नगर प्रमुख विष्टले भने,‘यसमा शत्रु अदृष्य छ, हतियार केही छैन, त्यसैले लडाई पेचिला छ ।’
नगर प्रमुख विष्टले दार्चुलाका अतिक्रमित लिपुलेक, कालापानी र लिम्पियाधुरा सहितका सबै भूमि सम्मानपूवर्क फिर्ता हुनु पर्नेमा जोड दिए ।
भीमदत्त नगरपालिकाका नगर उप प्रमुख सुशिला चन्द सिहले कार्यक्रम स्वागत मन्तव्य राख्दै पश्चिमी नाकामा राष्ट्रिय झण्डा फहरिन सबैका लागि गौरब भएको बताइन ।
‘आज ऐतिहासिक दिनमा झण्डा फहराइएको छ, झण्डा फहराउन सान र गौरबको कुरा हो’ नगर उप प्रमुख चन्दले भनिन ।
कार्यक्रममा जिल्ला प्रहरी कार्यालयका प्रहरी उपरीक्षक मुकुन्द मरासिनी, सशस्त्र प्रहरी उपरीक्षक वीरबहादुर साहु, सहायक प्रमुख जिल्ला अधिकारी गोकर्ण उपाध्याय, भीनपा १८ का अध्यक्ष एवम् नगर प्रवक्ता हिमालबहादुर चन्द, कार्यपालिका सदस्य गीता ओली, भीनपाका प्रमुख प्रशासकीय अधिकृत पुस्करप्रसाद भट्ट लगायत जनप्रतिनिधि, सुरक्षाकर्मी, स्थानीय सहभागी भएका छन् ।
भारतमा अंंग्रेजहरुले आफ्नो शासन कालामा सन् १९२० मा महाकाली नदीमा शारदा बाँध बनाएपछि पश्चिमी नाका प्रयोगमा आएको हो ।
