धनगढीमा अलपत्र परेका भारतीयहरुको कुँवरले गरे खाने बस्ने व्यवस्था
धनगढी । भारत जान नपाएर मध्य राति धनगढीमा अलपत्र परेका भारतीय नागरिकहरुलाई कैलाली उद्योग वाणिज्य संघका अध्यक्ष पुष्पराज कुँवरले खाने बस्ने व्यवस्था उपलब्ध गराएका छन् ।
कैलाली र कञ्चनपुरका बिभिन्न स्थानबाट भारत जान आएका सयौ व्यक्तिहरु सीमा नाकाबाट फिर्ता गरेका कारण मध्यराति धनगढी बजारमा अलपत्र परेका थिए ।
राति १ बजे उनीहरु धनगढीमा अलपत्र परेको जानकारी पाएपछि कुँवरले उनीहरुलाई उद्दार गरी चटकपुरस्थित आफ्नो होटल फ्लोरा लगे ।
उनीहरुलाई बातानूकुलित हलमा बस्ने व्यवस्था मिलाए । खाना खुवाए । अहिले पनि उनीहरु फ्लोरा होटलमै छन् ।
मध्यराति भारतीय नागरिकहरु धनगढीको सडकमा अलपत्र परेका जानकारी पाए, कुँवरले भने, र राति नै उनीहरुलाई उद्दार गरी होटलमा खाने वस्ने व्यवस्था मिलाए ।
कैलाली उद्योग वाणिज्य संघका अध्यक्ष कुँवरका अनुसार होटल फ्लोरामा भारतको बिहार,उत्तप्रदेश, मतिहारी लगायतका स्थानमा ५१ जना नागरिक रहेका छन् ।
उनीहरु भारत जान नाका खुला गरेको जानकारी पाएपछि गेटा मेडिकल कलेज, फुलवारी,कञ्चनपुरको गुलरियाबाट धनगढी आएका थिए ।
